अर्थमंत्री निर्मला सीतारमन यांनी सन २०२३-२४ चा अर्थसंकल्प सादर करताना शेअर मार्केटमध्ये सकारात्मक चित्र पहायला मिळाले. अदाणी समूहावर झालेल्या आरोपामुळे सोमवारपासून शेअर मार्केटमध्ये मरगळ आली होती. आज बुधवारी सकाळपासूनच बाजारात तेजी पाहायला मिळत होती. गेल्या काही दिवसांत ६० हजाराच्या खाली आलेला सेसेंक्स थोड्यावेळापूर्वी ६० हजारांच्या वर गेला. अर्थसंकल्पीय भाषण संपेपर्यंत यामध्ये आणखी वाढ होण्याची शक्यता आहे. मागच्या दहा वर्षात सादर केलेल्या अर्थसंकल्पावेळी फक्त दोन वेळा सेंसेक्स आणि निफ्टीमध्ये दोन टक्क्यांहून अधिकची वाढ पाहायला मिळालेली आहे. निर्मला सीतारमन यांनी भाषणाची सुरुवात करताच पहिल्या १० मिनिटांत ६०० अकांनी सेंसेक्सची उसळी पाहायला मिळाल.
निफ्टी देखील एक टक्क्याने वाढला. सेंसेक्सप्रमाणेच नॅशनल स्टॉक एक्सचेंजच्या निफ्टीमध्ये १३८ अंकाची वाढ पाहायला मिळाली आहे. सध्या निफ्टी १७,८०१ वर पोहोचला आहे. सर्वच सेक्टरच्या शेअर्ससमोर आज हिरवा रंग दिसत आहे. सकाळी ११.३० वाजता अर्थमंत्री निर्मला सीतारमन यांनी आपल्या भाषणात भांडवली गुंतवणूक ३३ टक्के वाढून १० लाख कोटी झाल्याचे सांगितले. जीडीपीच्या एकूण ३.३ टक्के एवढी ही गुंतवणूक आहे.
अर्थसंकल्पाच्या दिवशी कशी असते मार्केटची अवस्था
२०१३ पासूनचा मार्केट ट्रेंड पाहिला तर लक्षात येथे की मागच्या १० पूर्ण अर्थसंकल्पातून (निवडणुकांच्या वर्षातले अर्थसंकल्प अर्धे असतात) सहा वेळा सेंसेक्समध्ये उसळी पाहायला मिळाली आहे. तर सहा वेळा सेंसेक्स कोसळला होता. २०२० मध्ये सेंसेक्समध्ये २.४ टक्क्यांची घसरण झाली होती.
Discussion about this post