आयोगाच्या अध्यक्षा रुपाली चाकणकर यांनी पोलिसांना तपासाचे दिल निर्देश
४८ तासांत अहवाल सादर करण्याचे आदेश
नवी मुंबई । व्हीएसआरएस न्यूज ।
ऐरोली विधानसभेचे आमदार गणेश नाईक यांच्यावर एका महिलेने लैंगिक शोषणाचा आरोप केला आहे. याप्रकरणी संबंधित महिलेने राज्य महिला आयोगाकडे तक्रार दाखल केली होती. आयोगाच्या अध्यक्षा रुपाली चाकणकर यांनी पोलिसांना तपासाचे निर्देश देऊन ४८ तासांत अहवाल सादर करण्याचे आदेश दिले होते. आता गणेश नाईक यांना याप्रकरणी तात्काळ अटक करण्याची कार्यवाही देखील लवकरच केली जाईल, असं रुपाली चाकणकर यांनी सांगितलं आहे. राज्य महिला आयोग अॅक्शन मोडमध्ये आलेला असल्याने गणेश नाईक यांच्यासमोरील अडचणी वाढल्या आहेत.
महिलेच्या लैंगिक शोषणाच्या आरोपाप्रकरणी गणेश नाईक यांना तात्काळ अटक करणार : रुपाली चाकणकर
नवी मुंबईतील एका महिलेने आठवड्याभरापूर्वी गणेश नाईक यांच्याविरोधात लैंगिक शोषणाचे आरोप केले होते. १९९३ पासून गणेश लैंगिक शोषण करत असल्याचा आरोप संबंधित महिलेने केला. तसंच आपल्याला या संबंधातून पंधरा वर्षाचा मुलगा असल्याचं देखील महिलेने म्हटलं आहे. तशी रितसर तक्रार तिने पोलिसांकडे केली होती. परंतु पोलिसांनी तक्रार देऊनही कारवाई केली नसल्याने संबंधित महिलेने महिला आयोगाकडे न्यायासाठी धाव घेतली.
रुपाली चाकणकर यांनी काय म्हटलंय?
पीडित महिलेच्या तक्रारीची गंभीर दखल घेतली असून गणेश नाईक यांना याप्रकरणी तात्काळ अटक करण्याची कार्यवाही देखील लवकरच केली जाईल, असं रुपाली चाकणकर यांनी सांगितलं आहे.
“एका महिलेसोबत तिच्या इच्छेविरुद्ध शारीरिक संबंध प्रस्थापित केल्यानंतर झालेल्या अपत्याचा स्विकार न करणारे भाजप नेते आणि आमदार गणेश नाईक यांच्यावर पीडितेच्या तक्रारीनुसार गुन्हा दाखल करण्यात आला आहे. काही दिवसापूर्वी या महिलेने राज्य महिला आयोगाकडे तक्रार दाखल केली होती त्याप्रकरणी आयोगाने नवी मुंबई पोलिसांना यावर योग्य ती कारवाई करण्याचे निर्देश दिले होते.”
“यानंतर पोलिसांनी आज गणेश नाईक यांच्याविरुद्ध जीवे मारण्याची धमकी देणे व इच्छेविरुद्ध शारीरिक संबंध ठेवणे हे गुन्हे दाखल केले आहेत. गणेश नाईक यांना याप्रकरणी तात्काळ अटक करण्याची कार्यवाही देखील लवकरच केली जाईल”, असं रुपाली चाकणकर यांनी सांगितलं आहे.
Discussion about this post