नवी दिल्ली । व्हीएसआरएस न्यूज ।
करोनाचा नवीन वेरियंट ओमिक्रॉनचा (Omicron) संसर्ग जगातील ८९ देशांमध्ये पसरला आहे आणि तो डेल्टा प्रकारापेक्षा अधिक वेगाने पसरतोय. सामाजिक स्तरावर संसर्ग अधिक वेगान पसरत आहे. यामुळे फक्त दीड ते तीन दिवसांत रुग्ण दुप्पट होतात, असा इशारा जागतिक आरोग्य संघटनेने दिला आहे. जागतिक आरोग्य संघटनेने आपल्या ‘एनहांसिंग रेडिनेस फॉर ओमिक्रॉन’ (b.1.1.529) यासंदर्भात एक रिपोर्ट दिला आहे. ओमिक्रॉनचा सामाजिक स्तरावर संसर्गाचा प्रसार अधिक आहे. करोनाच्या डेल्टा वेरियंटच्या तुलनेत ओमिक्रॉनचा संसर्ग सामाजिक स्तरावर अधिक असेल, अशी शक्यता WHO ने व्यक्त केली आहे.
जागतिक आरोग्य संघटनेने शुक्रवारी हा रिपोर्ट दिला. १६ डिसेंबर पर्यंत WHO च्या सर्व सहा क्षेत्रांमधील ८९ देशांमध्ये Omicron संसर्ग आढळून आला आहे, असं अहवालात म्हटलं आहे. जसजसा अधिक डेटा उपलब्ध होईल Omicron वेरियंटची वर्तमान समज विकसित होत राहील, असं WHO ने सांगितलं. ओमिक्रॉन डेल्टा पेक्षा वेगाने पसरतो याचे पुरेसे पुरावे आहेत. डेल्टाचा सामाजिक स्तरावर प्रसार झाला. त्या देशांमध्ये ओमिक्रॉनचा प्रसार अधिक वेगाने होत आहे. ओमिक्रॉनचे रुग्ण दीड ते तीन दिवसांत दुप्पट होतात, असे आरोग्य संघटनेने म्हटले आहे.
देशातील ओमिक्रॉनच्या रुग्णांची संख्या वाढली
दुसरीकडे, देशात ओमिक्रॉनच्या रुग्णांची संख्या हळूहळू वाढत आहेत. शनिवारी ३० नवीन रुग्ण आढळले आहेत. त्यापैकी सर्वाधिक १२ रुग्ण तेलंगणात आढळून आले आहेत. महाराष्ट्रात ८, कर्नाटकात ६ आणि केरळमध्ये ४ नवीन रुग्ण आढळले आहेत. यानुसार देशात आतापर्यंत ओमिक्रॉनच्या एकूण रुग्णांची संख्या १४५ वर गेली आहे.
Discussion about this post