मी सध्या होम आयसोलेशनमध्ये आहे – देवेंद्र फडणवीस
डॉक्टरांच्या सल्ल्यानुसार माझे उपचार आणि औषधपाणी सुरु आहे
गेल्या काही दिवसांमध्ये माझ्या संपर्कात आलेल्यांनी स्वत:ची कोरोना चाचणी करुन घ्यावी
मुंबई । व्हीएसआरएस न्यूज ।
राज्याचे विरोधी पक्षनेते देवेंद्र फडणवीस यांना कोरोनाची लागण झाली आहे. देवेंद्र फडणवीस यांनी स्वत: ट्विट करून ही माहिती दिली. माझी कोरोना टेस्ट पॉझिटिव्हि आली आहे. मी सध्या होम आयसोलेशनमध्ये आहे. डॉक्टरांच्या सल्ल्यानुसार माझे उपचार आणि औषधपाणी सुरु आहे. गेल्या काही दिवसांमध्ये माझ्या संपर्कात आलेल्यांनी स्वत:ची कोरोना चाचणी करुन घ्यावी, असे फडणवीस यांनी ट्विटमध्ये म्हटले आहे. कोरोना झाल्यानंतर साधारण सात दिवस क्वारंटाईन राहावे लागते. त्यामुळे १० जून रोजी होणाऱ्या राज्यसभा निवडणुकीला देवेंद्र फडणवीस कसे उपस्थित राहणार, हे पाहावे लागेल. देवेंद्र फडणवीस यांनी शुक्रवारीच महाविकास आघाडीच्या नेत्यांची भेट घेतली होती. त्यामुळे या नेत्यांचीही कोरोना चाचणी पॉझिटिव्ह येणार का, याकडे सर्वांच्या नजरा लागल्या आहेत.
देवेंद्र फडणीस हे काल लातूर दौऱ्यावर होते. लातूरचा दौरा झाल्यानंतर ते सोलापूरच्या दौऱ्यावर जाणार होते. मात्र, त्यांना ताप आल्यामुळं तो दौरा अर्धवट सोडून ते मुंबईच्या दिशेनं रवाना झाले होते. देवेंद्र फडणवीस यांना यापूर्वीही कोरोनाची लागण झाली होती. त्यावेळी फडणवीस यांनी सरकारी रुग्णालयात उपचार घेतले होते.
गेल्या काही दिवसांपासून राज्यात कोरोना रुग्णांची संख्या झपाट्याने वाढत आहे. सध्या परिस्थिती चिंताजनक नसली तरी सोशल डिस्टन्सिंग आणि मास्कचा आवर्जून वापर करा, अशा सूचना मुख्यमंत्री उद्धव ठाकरे आणि आरोग्यमंत्री राजेश टोपे यांनी दिल्या आहेत. मुंबईतील दैनंदिन कोरोना रुग्णांचा आकडाही आता ७०० च्या आसपास जाऊन पोहोचला आहे. त्यामुळे येत्या काही दिवसांत मुंबईसह राज्यात कोरोनाची लाट येण्याची शक्यता वर्तविली जात आहे. देशपातळीवरही कोरोना रुग्णांच्या संख्येत वाढ होताना दिसत आहे. काँग्रेसच्या हंगामी अध्यक्ष सोनिया गांधी आणि प्रियांका गांधी यांनाही कोरोनाची लागणी झाली होती.
मुलांच्या लसीकरणाबाबत मुंबई महापालिकेने घेतला मोठा निर्णय
मुंबईत करोनाची रुग्णसंख्या हळूहळू वाढत लागली असतानाच मुंबई महापालिकेनेही करोनास वेसण घालण्यासाठी तातडीने उपाय सुरू केले आहेत. वैद्यकीय उपचार, चाचण्यांवर भर दिला जात असतानाच लसीकरणावरही नव्याने भर दिला जात आहे. महापालिकेने १२ ते १४ आणि १५ ते १७ वयोगटातील सर्व मुला-मुलींचे लसीकरण प्राधान्याने होण्याकडे लक्ष दिले आहे. वृद्धाश्रमांतील, तसेच अन्य ६० वर्षे आणि त्यावरील ज्येष्ठ नागरिकांना बूस्टर डोस देण्यावरही भर दिला आहे. या मोहिमेत पालिकेच्या आरोग्य कर्मचाऱ्यांमार्फत घरोघरी जाऊन भेटी देण्यात येत आहेत. त्यातून १२ ते १४ आणि १५ ते १७ वयोगटातील पहिली व दुसरी मात्रा न घेतलेल्या मुलांप्रमाणेच ज्या ६० वर्षांवरील ज्येष्ठ नागरिकांनी बूस्टर मात्रा घेतली नाही, त्यांची यादी तयार करण्यात आली आहे.
Discussion about this post