पुणे । व्हीएसआरएस न्यूज
पुण्यातील जम्बो कोविड सेंटरच्या उभारणीत मोठा भ्रष्टाचार झाल्याचा आरोप भाजपचे माजी खासदार किरीट सोमय्या यांनी केला होता. त्यावरून राज्यात सध्या राजकीय टीका-टिप्पणी सुरू आहे. उपमुख्यमंत्री व पुण्याचे पालकमंत्री यांनी आज या संदर्भात आपली भूमिका मांडताना सोमय्यांचे आरोप फेटाळून लावले. अजित पवार यांनी आज पुणे जिल्ह्यातील करोना स्थितीचा आढावा घेतला. या बैठकीत कोविड सेंटरच्या अनुषंगानं होत असलेल्या आरोपांवरही चर्चा झाली. अजित पवार यांनी अधिकाऱ्यांकडून संपूर्ण माहिती घेतली. त्यानंतर त्यांनी माध्यमांकडे भूमिका मांडली. जम्बो कोविड सेंटरच्या उभारणीत कुठलाही गैरव्यवहार झालेला नाही. सगळी कामे पारदर्शक पद्धतीनं झाली आहेत,’ असं अजित पवार यांनी सांगितलं.
पुणे महापालिकेत भाजपच्या कार्यकर्त्यांनी किरीट सोमय्या यांचा सत्कार केल्याबाबत अजित पवार यांनी काहीही बोलण्यास नकार दिली. तसंच, संजय राऊत यांनी ईडीच्या संदर्भात केलेल्या वक्तव्यांवरही त्यांनी बोलणं टाळलं. किराणा दुकानांतून वाईन विक्रीच्या राज्य सरकारच्या निर्णयाविरोधा ज्येष्ठ समाजसेवक अण्णा हजारे यांनी १४ फेब्रुवारीपासून बेमुदत उपोषणाचा इशारा दिला आहे. त्याबाबत विचारलं असता, ‘अण्णा हजारे यांच्या पत्राची सरकारनं दखल घेतली असून प्रधान सचिव वल्सा नायर या आज अण्णांना भेटणार आहेत, असं अजितदादांनी सांगितलं.
मुंबई, पुण्यासह राज्यातील महत्त्वाच्या महापालिका निवडणुका महाविकास आघाडीतील तिन्ही पक्ष एकत्र लढणार की स्वबळावर लढणार यावरून राजकीय वर्तुळात सध्या उलटसुलट चर्चा सुरू आहे. त्याबाबतही अजित पवार यांनी भूमिका मांडली. ‘प्रभागरचना अंतिम झाल्यानंतरच महापालिका निवडणुकींमधील आघाडीबाबत निर्णय घेतला जाईल,’ असं ते म्हणाले.
Discussion about this post