मुंबई । व्हीएसआरएस न्यूज ।
मुंबईतील नाताळ, नववर्षाच्या पार्ट्यांवर नियंत्रण ठेवण्यासाठी महापालिकेने नवीन नियम जारी केले आहेत. त्यानुसार, एखाद्या कार्यक्रमात २०० व्यक्ती जमणार असल्यास स्थानिक सहायक पालिका आयुक्तांची परवानगी गरजेची आहे. तसेच, कार्यक्रमांमध्ये दोन व्यक्तींमध्ये सहा फुटांचे अंतर राखावे लागणार आहे. मात्र एखाद्या कार्यक्रमात दोन व्यक्तींमध्ये सहा फुटांचे अंतर राखणे शक्य आहे का, असा प्रश्न निर्माण झाला आहे.
मुंबई महापालिकेने गेल्या शनिवारी नववर्षाच्या अनुषंगाने एखाद्या कार्यक्रमात १,००० व्यक्ती जमणार असल्यास त्यासाठी सहायक महापालिका आयुक्तांची परवानगी घेणे बंधनकारक केले होते. त्यात, बदल करत आता हा नियम २०० व्यक्तींसाठी लागू केला आहे. पालिका आयुक्त इकबाल सिंह चहल यांनी सुधारित नियमावली जाहीर केली आहे. त्याचप्रमाणे, पालिका आणि पोलिस यंत्रणा लक्ष ठेवणार असून नियम मोडल्यास कारवाई केली जाणार असल्याचे आहे.
नेमका हा नियम सभागृहाच्या आयोजकांप्रमाणे तिथे कॅटरिंग व्यवस्थापनासाठी कठीण होणार असल्याची प्रतिक्रिया व्यक्त होत आहे. राजकीय समारंभ, लोकल-बस सेवा, बाजारपेठा अशा सर्वच ठिकाणी गर्दी होत असते, तेव्हा सहा फुटांचा नियम का बंधनकारक केला जात नाही, असा प्रश्न उपस्थित केला जात आहे.
पालिकेचा सुधारित नियम प्रत्यक्षात अवलंबणे म्हणजे कडेलोट असल्याची प्रतिक्रिया धनश्री कॅटेरर्सचे पराग साठे यांनी दिली आहे. या कालावधीत लग्नासह अन्य कार्यक्रम आयोजित केले असतील त्यांची पंचाईत होणार असल्याचे म्हटले आहे. हा नियम आयोजकांसह व्यवसायावर विपरित परिणाम करेल, अशीही भीती व्यक्त केली आहे.
नवीन नियम हा सर्वांसाठी मारक ठरू शकतो, असा अंदाज अंधेरी-विलेपार्ले येथील कॅटरर्स सुनील वेंगुर्लॆकर यांनी व्यक्त केला आहे. कोणताही कार्यक्रम हा पूर्वनियोजित असल्याने आता तिथे सहा फुटांचे बंधन आणणे हा विरोधाभास असल्याचे म्हटले आहे. मुंबईच्या लोकल, बस खच्चून भरून जात असताना केवळ कार्यक्रमांमध्ये सहा फूट अंतर राखण्याच्या नियमाचा अट्टहास धरणे चुकीचे आहे, अशी टीका केली जात आहे.
मुंबईत ओमायक्रॉनचे रुग्ण आढळत असल्याने पालिकेने काही नवे नियम बंधनकारक केले आहेत.
-लग्नसोहळे, कार्यक्रम, पार्ट्या किंवा तत्सम कोणतेही कार्यक्रम बंदिस्त जागेत असल्यास ५० टक्के उपस्थिती.
-मोकळ्या जागेत होणाऱ्या कार्यक्रमांसाठी २५ टक्के
-त्या ठिकाणी मास्क, सॅनिटायझेशनची व्यवस्था असावी.
-एकत्र जमणाऱ्या व्यक्तींमध्ये सहा फुटांचे अंतर असावे.
Discussion about this post