मुंबई : राज्य सरकारने नैसर्गिक वायूवरील करात १० टक्क्यांची कपात केली आहे. नैसर्गिक वायूचा कर १३.५ टक्क्यांवरून ३.५ टक्के इतका केला आहे. यामुळे राज्यात सीएनजी आणि पीएनजी गॅस स्वस्त होण्याची शक्यता आहे. मात्र मूल्यवर्धित कर जैसे थे ठेवल्याने पेट्रोल आणि डिझेल स्वस्त होण्याच्या अपेक्षांवर आज पाणी फेरले. महाविकास आघाडी सरकारने आज तिसरा अर्थसंकल्प विधिमंडळात सादर केला. यात अर्थमंत्री अजित पवार यांनी नैसर्गिक वायूवरील कर ३.५ टक्के इतका केला आहे. यापूर्वी तो १३.५ टक्के होता. त्यामुळे लवकरच गॅस वितरक कंपन्यांकडून दर कपात होण्याची शक्यता आहे.
दरम्यान, जागतिक बाजारात कच्च्या तेलाच्या किमतीत वाढ झाल्याने गेल्या काही महिन्यांपासून राज्यात सीएनजी आणि पीएनजीच्या दरात वाढ झाली होती. मुंबई आणि पुणे सारख्या महानगरात सीएनजीचा दर ६३ ते ६६ रुपयांच्या दरम्यान आहे. घरगुती वापराचा पाईप गॅस आता ३६ ले ३८ रुपये किलो आहे. जानेवारी २०१८ ते जानेवारी २०२२ या कालावधीत सीएनजी सुमारे १८ रुपयांनी महागला आहे. एक जानेवारी २०१८ रोजी सीएनजीचा दर ४७.५० रुपये होता. तो दर आता ६६ रुपयांवर आहे. त्यामुळे नागरिकांच्या खिशावर आर्थिक भार वाढला आहे.
आज पेट्रोल आणि डिझेलवरील मूल्यवर्धीत करात मात्र कोणतीही कपात करण्यात आली नाही. त्यामुळे ग्राहकांना पेट्रोल आणि डिझेल चढ्या दराने खरेदी करावे लागणार आहे. दिवाळीत केंद्र सरकारने पेट्रोल आणि डिझेलवरील उत्पादन शुल्कात कपात केली होती. त्यानंतर भाजपशासित राज्यांनी शुल्क कपात केली. मात्र राज्यातील महाविकास आघाडी सरकारने इंधनावरील व्हॅटचा दर जैसे थेच ठेवला होता.
Discussion about this post