सातारा । व्हीएसआरएस न्यूज ।
राष्ट्रवादी काँग्रेसचे अध्यक्ष शरद पवार यांच्या घरावरील हल्ला प्रकरणी एसटी कर्मचाऱ्यांचे वकील गुणरत्न सदावर्ते यांना पोलिसांना अटक करण्यात आली असतानाच आता सदावर्तेंना दुहेरी झटका बसला आहे. सातारा कोर्टाने गुणरत्न सदावर्तेंना चार दिवसांची पोलिस कोठडी सुनावली आहे.
मुख्यमंत्र्यांच्या मेहुण्यावर सोमय्यांचा नवा आरोप, शिवाजी पार्कमधील बिल्डिंग उभारण्यासाठी काळा पैसाचा वापर साताऱ्यातील छत्रपती घराण्यावर टीका केल्याप्रकरणी सदावर्ते यांच्यावर गुन्हा दाखल करण्यात आला आहे. त्यामुळं आज सातारा जिल्हा व सत्र न्यायालयात गुणरत्न सदावर्ते यांना न्यायालयात हजर करण्यात आले होते. सुनावणी पूर्ण झाल्यानंतर कोर्टाने गुणरत्न सदावर्ते यांना पोलिस कोठडी सुनावली आहे.
शरद पवार यांच्या घरासमोर आंदोलन झाल्यानंतर गुणरत्न सदावर्ते यांच्यावर गुन्हा दाखल करण्यात आला होता. त्यानंतर त्यांना मुंबई पोलिसांनी अटक केली होती. काल मुंबई पोलिसांकडून सातारा पोलिसांनी गुणरत्न सदावर्ते यांचा ताबा घेतला होता. काल रात्री उशीरा पोलिसांनी त्यांना सातारा येथे आणलं. त्यांना सकाळी ११ वाजता कोर्टात हजर करण्यात आलं. कडेकोट बंदोबस्तात सदावर्ते यांना न्यायालयात हजर करण्यात आलं. त्यानंतर सुनावणी पूर्ण झाल्यानंतर त्यांना न्यायालयाने ४ दिवसांची पोलिस कोठडी सुनावली आहे.
दरम्यान, शरद पवार यांच्या नेपियन्सी रोड येथील सिल्वर ओक या निवासस्थानी शंभराहून अधिक एसटी कर्मचाऱ्यांनी हल्लाबोल आंदोलन केले. गावदेवी पोलिस ठाण्यात या आंदोलकांवर वेगवेगळ्या कलमांतर्गत गुन्हा दाखल करून वकील गुणरत्न सदावर्ते यांच्यासह ११५ आरोपींना अटक करण्यात आली. गुणरत्न यांच्यासह या कटातील प्रमुख असलेल्या अभिषेक पाटील, चंद्रकांत सूर्यवंशी आणि इतर पाच जणांना गिरगाव येथील न्यायालयात बुधवारी हजर करण्यात आले. सूर्यवंशी आणि अभिषेक पाटील यांची समोरासमोर चौकशी करायची असल्याने न्यायालयाने त्यांना पोलिस कोठडी सुनावली, तर सदावर्ते यांच्यासह इतरांची रवानगी न्यायालयीन कोठडीत केली. यानंतर लगेचच सातारा पोलिसांनी ताबा घेण्यासाठी केलेला अर्ज न्यायालयाने मान्य केला. त्यानुसार सातारा पोलिसांनी गुरुवारी सदावर्ते यांचा आर्थर रोड कारागृहातून ताबा घेतला. धार्मिक तेढ तसेच वादग्रस्त विधान केल्याप्रकरणी दाखल गुन्ह्यात समन्स बजावूनही उपस्थित राहत नसल्याने सातारा पोलिसांनी सदावर्ते यांना ताब्यात घेतले आहे.
Discussion about this post