व्हीएसआरएस मराठी न्युज –पिंपरी-चिंचवड पोलिसांच्या खंडणी विरोधी पथकाने चौघांना अटक करून त्यांच्याकडून पाच पिस्तूल आणि दहा काडतुसे जप्त केली.
अस्लम अहमद शेख (रा. थेरगाव), सचिन उत्तम महाजन (रा. सुरवड, ता. इंदापूर), संतोष विनायक नातू (रा. स्वारगेट, पुणे), राहुल उर्फ खंडू गणपत ढवळे (रा. पिंपळगाव, ता. दौंड) अशी अटक केलेल्यांची नावे आहेत. पोलिस उपायुक्त स्वप्ना गोरे यांनी दिलेल्या माहितीनुसार, खंडणी विरोधी पथकातील पोलिस रमेश गायकवाड, गणेश गिरीगोसावी, विजय नलगे हे रहाटणी येथे गस्त घालत होते. त्यावेळी त्यांना माहिती मिळाली की, जगताप डेअरी चौकात एकजण थांबला असून त्याच्याकडे शस्त्र आहे. त्यानुसार पोलिसांनी सापळा लावून अस्लम शेख याला ताब्यात घेतले. त्याच्याकडून एक पिस्तूल जप्त केले. त्यानंतर त्याच्याकडे चौकशी करून त्याच्या तीन साथीदारांना अटक केली. तसेच आणखी चार पिस्तूल आणि दहा काडतुसे असा एकूण दोन लाख ५५ हजारांचा मुद्देमाल पोलिसांनी जप्त केला.
सचिन, संतोष, राहुल हे रेकॉर्डवरील गुन्हेगार आहेत. त्यांच्यावर पुणे, पुणे ग्रामीण आणि सोलापूर येथे दरोडा, खून, खुनाचा प्रयत्न, खंडणीसाठी अपहरण, जबरी चोरी, जबर दुखापत करणे, बेकायदेशीरपणे अग्नीशस्त्र बाळगणे असे गुन्हे दाखल आहेत. सचिन महाजन याच्यावर पुणे ग्रामीण पोलिसांनी ‘मोका’ची कारवाई केली आहे. तर संतोष नातू याला पुणे पोलिसांनी तडीपार केले आहे.
पोलिस उपायुक्त स्वप्ना गोरे, सहायक आयुक्त सतीश माने यांच्या मार्गदर्शनाखाली वरिष्ठ पोलिस निरीक्षक अरविंद पवार, सहायक निरीक्षक उध्दव खाडे, सहायक उपनिरीक्षक रमेश गायकवाड, अमर राऊत, तसेच खंडणी विरोधी पथकाचे पोलिस अंमलदार निशांत काळे, गणेश गिरीगोसावी, विजय नलगे, सुनील कानगुडे, किरण काटकर, प्रदीप गोडांबे, आशिष बोटके, रमेश मावसकर, प्रदीप गायकवाड, शैलेश मगर, चंद्रकांत जाधव, ज्ञानेश्वर कुऱ्हाडे, सुधीर डोळस, प्रदीप गुट्टे, भरत गाडे यांच्या पथकाने ही कारवाई केली.
Discussion about this post