व्हीएसआरएस मराठी न्युज पिंपरी -पिंपरी चिंचवड महानगरपालिका क्षेत्रात पवना धरणातून आणि काही भागात एमआयडीसीतून पाणी पुरवठा केला जातो. मागील वर्षी पवना धरण शंभर टक्के भरले होते.
शहरात २४x७ पाणी पुरवठा करण्याचे आश्वासन मनपा प्रशासन आणि पदाधिका-यांनी अनेकवेळा दिले होते. अद्यापही शहरात अनियमित आणि अवेळी अपुरा पाणी पुरवठा केला जात आहे. या विषयावर दि. २४ फेब्रुवारी २०२२ रोजी पिंपरी चिंचवड शहर महिला काँग्रेसच्या वतीने मनपा भवनावर जन आंदोलन करीत हंडा मोर्चा काढला होता. त्यावेळी आयुक्त राजेश पाटील यांनी पुढील पंधरा दिवसात पाणी पुरवठा सुरळीत करु असे महिला काँग्रेसच्या शिष्टमंडळास आश्वासन दिले होते.
आयुक्त राजेश पाटील आणि त्यांच्या प्रशासनाने अद्यापही पाणी पुरवठ्याबाबत गांभिर्य दाखविलेले नाही. याचा निषेध म्हणून गुरुवारी (दि. २४ मार्च) सकाळी १०:३० वाजता पिंपरी चिंचवड शहर जिल्हा महिला काँग्रेसच्या वतीने भारतरत्न डॉ. बाबासाहेब आंबेडकर पुतळा चौकात धरणे आंदोलन करण्यात येणार आहे अशी माहिती काँग्रेसच्या शहराध्यक्षा सायली नढे यांनी पत्रकार परिषदेत दिली. पिंपरी येथे मंगळवारी आयोजित केलेल्या पत्रकार परिषदेत नढे बोलत होत्या. यावेळी जेष्ठ नेत्या निगार बारस्कर, डॉ. मनिषा गरुड, निर्मला खैरे, वैशाली शिंदे, सीमा हलकट्टी, रिटा फर्नांडिस आदी उपस्थित होते.
यावेळी सायली नढे यांनी सांगितले की, पिंपरी चिंचवड शहराला रोज ६०० एमएलडी पाणी लागते. यापैकी ३० एमएलडी पाणी एमआयडीसीकडून दिले जाते. उर्वरीत पाणी पवना धरणातून घेतले जाते. तसेच पवना धरणातून वाघोली पाणी योजनेसाठी हि ३० एमएलडी पाणी दिले जाते. पिंपरी चिंचवड महानगरपालिकेतील नागरिकांसाठी २४ तास पाणी पुरवठा करण्यासाठी पवना बंद जलवाहीनी प्रकल्प, भामा आसखेड पाणीपुरवठा योजना आणि आंद्रा धरणातूनही पाणी घेऊन शहरातील नागरीकांना देणार होते. मागील पाच वर्षात पवना बंद जलवाहिनी प्रकल्प जैसे थे आहे.
मागील पाच वर्षात या योजनेसाठी शहरातील बहुतांशी रस्ते खोदाई करुन जलवाहिनी टाकण्यासाठी हजारो कोटी रुपये आतापर्यंत खर्च केले आहेत. अशा विविध योजनांव्दारे नागरिकांच्या पैशाचा चुराडा मागील पाच वर्षात भाजपाच्या पदाधिका-यांनी केला आहे. आगामी आठ दिवसात शहरातील झोपडपट्टी, गावठाण व चाळींमधिल परिसरातील पाणी पुरवठा प्रशासनाने सुरु करावा अशी मागणी गुरुवारच्या आंदोलनाव्दारे महिला काँग्रेस करणार आहे अशी माहिती यावेळी पत्रकार परिषदेत देण्यात आली.
Discussion about this post