नवी दिल्ली । व्हीएसआरएस न्यूज ।
एनडीएकडून उपराष्ट्रपतीपदासाठी जगदीप धनखड यांच्या नावाची घोषणा करण्यात आल्यानंतर आता यूपीएकडूनही उपराष्ट्रपती पदासाठीच्या उमेदवार नाव जाहीर करण्यात आलं आहे. यूपीएकडून मार्गारेट अल्वा यांच्या नावाची घोषणा करण्यात आली आहे. राष्ट्रवादीचे सर्वेसर्वा शरद पवार यांनी मार्गारेट अल्वा यांचं नाव जाहीर केलं. उपराष्ट्रपती पदासाठीच्या नावावर शिक्कामोर्तब करण्यासाठी विरोधीपक्षाची शरद पवार यांच्या नवी दिल्ली येथील निवासस्थानी बैठक पार पडली. या बैठकीत १७ पक्षांनी मार्गारेट अल्वा यांना आपला पाठिंबा दर्शवला.
महत्त्वाची बाब म्हणजे राष्ट्रपतीपदीसाठी एनडीएच्या उमेदवार द्रौपदी मुर्मू यांना पाठिंबा देणाऱ्या शिवसेनेने उपराष्ट्रपतीपदासाठी मार्गारेट अल्वा यांना आपला पाठिंबा दर्शवला आहे. विरोधीपक्षातील १७ पक्षांमध्ये शिवसेनेचाही सहभाग होता. विशेष म्हणजे शरद पवार मार्गारेट अल्वा यांच्या नावाची घोषणा करताना शरद पवारांच्या अगदी मागे शिवसेना खासदार संजय राऊत बसलेले दिसले.
मार्गारेट अल्वा कोण आहेत?
मार्गारेट अल्वा या काँग्रेस पक्षाचे उमेदवार म्हणून पहिल्यांदा १९९९ च्या लोकसभा निवडणुकांमध्ये कर्नाटक राज्यातील कनारा लोकसभा मतदारसंघातून लोकसभेवर निवडून गेल्या. १९७४ ते १९९८ या काळात राज्यसभेच्या सदस्या होत्या. ६ ऑगस्ट २००९ ते १४ मे २०१२ पर्यंत त्यांनी उत्तराखंडच्या पहिल्या महिला राज्यपाल म्हणून काम केले. उत्तराखंडच्या राज्यपालपदी काम केल्यानंतर त्या २०१२ ते २०१४ पर्यंत राजस्थानच्या राज्यपाल होत्या. त्या भारतीय राष्ट्रीय काँग्रेसच्या ज्येष्ठ सदस्या आणि अखिल भारतीय काँग्रेस कमिटीच्या सरचिटणीस आहेत. त्यांना मर्सी रवी पुरस्काराने सन्मानित करण्यात आलं आहे. मार्गारेट अल्वा यांना कायद्याचं चांगलं ज्ञान आहे. त्यांची प्रशासनावर चांगली पकड आहे. तसेच, त्यांना प्रदीर्घ काळाचा राजकाणातील अनुभव आहे.
Discussion about this post