व्हीएसआरएस मराठी न्युज -आरोग्य विभागाने १ जून ते ८ जुलै या कालावधीत हे कंटेनर सर्वेक्षण केले. त्यामध्ये एक लाख २ हजार ४४७ घरांची तपासणी करण्यात आली. त्यापैकी एक हजार ४२५ घरांमध्ये डास अळ्या आढळून आल्या. तसेच, २७३ कायमची डासोत्पती स्थानके आढळली. तर, ४९४ तात्पुरत्या स्वरुपातील डासोत्पत्ती स्थानके आढळली.
आता महापालिकेकडून डासोत्पत्ती स्थानके आढळून आलेल्या २८७ जणांना नोटिसा बजावण्यात आल्या असून. पाच जणांकडून ५२ हजारांचा दंड वसूल करण्यात आला आहे. तर शहरात औषध फवारणी सुरू करण्यात आल्याचे आरोग्य कार्यकारी अधिकारी गणेश देशपांडे यांनी सांगितले.
डेंग्यू या रोगाचा प्रसार वाढू नये यासाठी डास उत्पत्तीवर नियंत्रण ठेवणे महत्वाचे आहे. त्याकरिता दर आठवड्याला घरातील पाणी साठविण्याच्या सर्व भांड्यातील पाणी वापरुन भांडी रिकामी करुन कोरडी करावीत, असे आवाहन महापालिकेने केले.
घरात पाण्याची साठवण करतो तसेच घराभोवतीच्या परीसरात साठलेले सांडपाणी असे साठलेले पाणी डासांच्या वाढीस उपयुक्त असते. साठलेल्या पाण्यात डासांच्या अळ्या वाढल्या तरी आपण त्याकडे विशेष लक्ष देत नाही. त्यामुळे डासांची उत्पत्ती विनासायास होते. डासांच्या अंडयापासुन त्याचा डास होण्यास 8 ते 10 दिवसांचा कालावधी लागतो.
त्यासाठी दर आठवडयास साठलेले पाणी एकदा पूर्णपणे वापरुन ड्रम कोरडा केला, सुकवून नंतर परत भरला. तर, त्या पाण्यात असलेल्या पण नजरेस न दिसणा-या अंडी/अळ्या मारल्या जातील. तसेच घराभोवतीच्या साठलेल्या पाण्याची डबकी बुजविली किंवा साठलेले पाणी वाहते केले. तर, डासांच्या उत्पत्तीस आळा बसेल.
घरातील पाण्याचे काही साठे असे पूर्णपणे रिकामे करता येणे शक्य नसते. उदा. घरावर असलेली पाण्याची टाकी किंवा फ्लॅटच्या तळघरात असलेली साठलेले पाणी अशा ठिकाणी डासांनी अंडीच घालू नयेत म्हणुन या टाक्या पूर्णपणे झाकण टाकुन बंद ठेवाव्यात म्हणजे डास टाकीत शिरु शकणार नाहीत.
घरामध्ये आपल्याकडुन दुर्लक्षित असणारे साठलेले पाणी फ्लॉवर पॉट, कुलर, मनीप्लॅन्ट, घरातील छोटे शोभेचे कारंजे, फ्रिजचा खालचा ट्रे अशा ठिकाणी असते. दर आठवडयास या वस्तुतील पाणी बदलले गेले नाही तर डासांना अंडी घालण्यास उत्तम जागा मिळते.
घराभोवतीच्या पाण्याची डबकी असतील तर ती बुजविणे किंवा सदर ठिकाणे पाणी वाहते केले जाईल. याबाबत दक्षता घेणे आवश्यक आहे.
Discussion about this post