पुणे: मांजरी बुद्रुक येथील अनधिकृत बांधकामावर पीएमआरडीएनं (PMRDA) सुरू केलेल्या कारवाईमुळं पुण्यात (Pune) तणाव निर्माण झाला आहे. या कारवाईच्या विरोधात स्थानिक महिला आक्रमक झाल्या असून त्यांनी बांधकाम सुरू असलेल्या एका इमारतीवरच ठाण मांडलं आहे. पीएमआरडीएनंही अनधिकृत बांधकामं पाडणारच असा ठाम पवित्रा घेतल्यामुळं वेगळाच पेच निर्माण झाला आहे.
बांधकाम सुरू असताना काही दिवसाआधी पुण्यात एका इमारतीचा स्लॅब कोसळून सात कामगारांचा मृत्यू झाला होता. या दुर्घटनेची गंभीर दखल घेत पुणे महापालिकेनं मोहीम राबवत अनधिकृत आणि अतिक्रमित बांधकामावर हातोडा चालवायचा निर्णय घेतला. त्यानुसार आज पुण्यातील मांजरी इथं अनधिकृत असलेल्या बांधकामावर कारवाई सुरू करण्यात आली होती. मात्र, स्थानिक रहिवाशांनी या कारवाईला जोरदार विरोध केला. काही नागरिक व महिला इमारतीवर चढल्या आणि तिथंच ठिय्या दिला. पीएमआरडीएच्या अधिकाऱ्यांनीही दबावाखाली न येता बांधकाम पाडण्याची भूमिका घेतली आहे. त्यामुळं अधिकारी आणि नागरिकांमध्ये संघर्ष होण्याची चिन्हं आहेत. घटनास्थळी १५० वर पोलीस तैनात करण्यात आले आहेत.
Discussion about this post